در بيان مسلك صحيح

دكله كل اى ايليان دعواى عشق++

دل اوى اولمق كرك مأواى عشق

يوقسه عشق نامن الآن سرده هوا++

هم مضل هم رهزن و هم بيدوا

هيچ ايدرمى عشق تقليدى قبول++

روضه عرفانه ايتديرسون دخول

اولا شرع شريفه انتساب++

لابد اولمش كه اوله قرب اكتساب

باب الابواب اولدى چون شرع منير++

اولميان داخل اولورمى مستنير

شرعله ايتمك كرك كسب صلاح++

فتح اوله صكره اكا باب فلاح

رفرف عشق اوله اول جانه دليل++

اچيلور منهاج پر فيض خليل

كر عقايد اولمسه وفق كتاب++

سد اولور مطلق اكا راه صواب

منصفانه حصر ايدوب فكر جلى++

راضيمى اللَّه محمّد له علي

كسب ايدن بو وجهله حسن خصال++

اوله مظهر كيم تجلّى وصال

حفظ شرع اللَّه ايچون اول نامدار++

ايلدى بونجه غزايى اختيار

اتقاسن درك ايدوب اولمه عنيد++

ايتديلر شاهى صلاة ايچره شهيد

كرمحب حيدر ايسه ك بى ريا++

اثرينه ايله سلوكه اعتنا

امرى طوت ايله نواهيدن حذر++

چكميه سك صكره خسران و كدر

عاقله لا يقميدر فكر سقيم++

مصطفى اثرى طور ركن مستقيم

جاهد دين مبين اولدى على++

ماحى كفر متين اولدى علي

مظهر سر محمّد در علي++

هم توجهدار احمد در علي

ايله نفسكله جهاد اكبرى++

بوله سن فيض رضاى حيدرى

بو رضا عين رضاى مصطفى++

هم رضاى ذات پاك كبريا

سلّموا صلّوا على فخر الأنام++

هم عليّ و آل و اصحابه تمام

دعا و خاتمه

ربنا بخش ايت بزى پيغمبره++

ال و اصحابيله ذات حيدره

او قونان قرآن مولود و صلاة++

همده تهليل ايله اخلاص بينات

عاجزانه ايلرز عرض حضور++

هم قبول ايله ادله عفو قصور

اجرى اولسون روضه پاك رسول++

ال و اولاديله اصحابه وصول

هم اوله ارواح جمله مؤمنين++

فضلك ايله عفو وغفرانه قرين

باعث مجلس اولان اباد اوله++

سامعين و قارئين دلشاد اوله

ربّنا عفوايت بزم عصيانمز++

عاجزز بز چوق درر طغيانمز

ربّنا قويمه بزى بزه همان++

لطف و احسانك دريغ ايتمه امان

شاهمز سلطان حميد بن مجيد++

عمر و اقبالى اوله يا رب مزيد

صحّت و توفيق و نصرتله مدام++

سلطنتله ايله يا رب مستدام

دشمنى وارايسه اولسون ربنا++

قهر و نكبت هم مذلتله فنا

عسكر اسلام منصور اللوا++

همده حجاج كرام ذو صفا

عافيتله ايده لر حسن ادا++

خدمت مفروضه يى وفق رضا

بن سليمان جلاله قيل عطا++

فيض عشقك ايله توفيق و رضا

قيل عنايت قوللرينه يا معين++

رحمة اللَّه عليهم اجمعين

باب والاى سر عسكرى مكتوبجيسى اديب شهير و شاعر روشن ضمير عطوفتلو احمد مختار افندى حضرتلرينك تقريض كونه انشاد بيوردقلرى دل رباى ارباب عرفان اولان منظومه بليغه در.

بارك اللَّه اى مقدس خامه مير جلال++

بر اثر قيلدك كه عبرتكاه دهره يادكار

شير يزدانك تجلى ء وجود پاكنه++

صانكه بر مرآت معنا در عيان و آشكار

بويله بر نظم بديعك حكمت تقديرينى++

قادر اولماز وصفنه 'مختار' عديم الاختيار

مكتوبى ء سر عسكرى

أحمد مختار

خواجه دبستان عرفان و مرشد مشكل كشاى سالكان، اعاظم رجال قادريه دن انزواگزين صفا و مرد ميدان صدق و وفا، اسكدارى رشادتلو، شيخ عثمان شمس افندى، حضرتلرينك، چكيده خامه بلاغت كستريلرى اولان نشيده رعنا در.

حبّذا اهل سخن مير سليمان جلال++

يازدى برنو اثر منقبه عال العال

يعنى سلطان ولايت كه علي حيدر در++

نظم ايدوب انك ايچون مولد سنجيده مقال

دخى حقنده شر فسانح اولان آثارى++

مسلك نظمه چكوب ايلدى مانند نوال

بر سليمان يازوب مولد پاك نبوى++

بر سليمان دخى مولد سر نامه آل

'شمس' تحسين ايدوب آثارينى قيلدم تقريض++

ايليه سعينى مشكور خداى متعال