مبحث مولد علىّ
اى محب صادق آل عبا++
وى اولان كوكلنده اخلاص وفا
مرتضى مولدينى دكله عيان++
خامه م ايتسون وقعه يى شرح و بيان
هاشمى كلزارينك خوش لاله سى++
هم سعادت ماهنك بر هاله سى
يعنى ام پاك شاه اوليا++
حيدر كرّار عليّ المرتضى
فاطمه بنت الاسد اولكامله++
چون ابو طالبدن اولدى حامله
گلدى اوّل پاكيزه يه بشقه شرف++
حامل در يتيم اولدى صدف
كجدده ايكن هفته و ايام ماه++
گلدى اوّل دل داره يه چون انتباه
كوردى حملندن چوق اثار عجيب++
چون ظهوره گلدى احوال غريب
سال فيل اوتوزينه يتدى همان++
يگرمى اوچ ييل هجرته واردى زمان
سوق ايدوب حق قدردن اعلانه آنى++
اون او چنجى رجبك جمعه كونى
اولمشيدى مدت حملى تمام++
اولدى اول كون عازم بيت الحرام
انده ايكن حامل شير نره++
اضطرابندن او توردي بر يره
فطرت ذاتيه سى پاك و طهور++
كيم تجلّى ء ازل ايتدى ظهور
كيمسه يه واقع دكل كن بو شرف++
طوغدى بيت ايچره همان خيرالخلف
بصدى بغرينه اودم نوزداينى++
هم اسد تسميه قيلدى آدينى
استر ايسن مصطفى يه انتساب++
قيل رضاى مرتضى يى اكتساب
سلّموا صلّوا على خير الورى++
هم باسرار علي المرتضى
در ستايش حضرت امام عليّ
نخل والا ميوه عزّ و شرافتدر علي++
صلب پاك و مبدأ سر سيادتدر علي
زوج زهرا نور عين احمد اُم المؤمنين++
فرق امتده ولايتله سعادتدر علي
قافله سالار معنا منهج فيض وصال++
ره روان عشقه مصباح رشادتدر علي
ذاتنه فرط توجهدن بيور مشدر رسول++
ذكر نامى امته محض عبادتدر در علي
آستان فيض احسانك كداسيدر جلال++
منبع جود و عطا لطف و سخاوتدر علي