ديباجه منظومه مولد جناب امام على
حمد بى پايان اوله اول خالقه++
ايلدى الطافنه پر لاحقه
اولمامش بر كيمسه حالا خامه ران++
مرتضى مولودينى ايتسون عيان
ايتدى بو امر مهم ياده خطور++
عجزم اولدى مايع رسم سطور
ايلدم حقه بو وجهله نياز++
وير بكا يا رب بو يوزدن امتياز
گلدى شوقه خامه بى اقتدار++
نظم مولود على يه اجتسار
بو غنيمتدر اولرمى هيچ فدا++
ايليه بو خدمتى خامه م ادا
كيتمامش بو وادى يه فكر سلف++
حصه مه قالمش ازلدن بو شرف
عجزمه باقمز چون عطاسنده مجيب++
ايلمش بن قولنه بخش و نصيب
لطف ايدوب توفيقنى اول ذو الكرم++
شرميله الدم اله كاغد وقلم
ايتمدم ترتيبنه صرف شعور++
ضبط ايدوب فكره نه ايتديسه ظهور
اختصارى ايلدم چون التزام++
قويمدم بو مبحثه فضله كلام
كلشن عرفانه قيلدم يادگار++
طاغيدر البت جهانه روزگار
قارئين و سامعين اولسون بكام++
ايده بزم اهلى صلاته اهتمام
ايليان بو احقرى خيريله ياد++
دو جهانده اوله لر مسرور و شاد
كيم ديلرسه اوله راضى مصطفى++
ايلسون جاندن على يه التجا
سلّموا صلّوا على خير الورى++
هم باسرار عليّ المرتضى
الهي
اى ساقى كوثر امان++
صف بسته عشقه امام
لطف ايله بر جام صفا++
ايله نبى مست مدام
اى اهل دردك رهبرى++
قيلمه ملول بو كمترى
بن امت پيغمبرى++
اى حيدر عالى مقام
كوكلم خرابدر نافله++
الماز نبى بر قافله
رحم ايت جلال غافله++
محتاج سكا خاص و عوام