در اوصاف جليله چهار يار با صفا

اصدقاى جار يار با صفا++

بوذر مقداد و سلمان مرتضى

برى يار صدق ممدوح الشيم++

بريسى صاحب جلال وهم كرم

برى منا اهل بيتين از عجم++

بريسيدر منبع جود وكرم

هر برى سر چشمه ماء الحيات++

عارف سرّ بطون بيّنات

هر بريدر رهبر فوز و نجات++

واقف راز خفاياى نكات

هر برى منظور نزد مجتبى++

هر برى ممدوح محبوب خدا

مستشار بزم خاصّ احمدى++

بولديلر بزمنده فيض سرمدى

چوق شرف سانح اولوب مدح و ثنا++

حقلرنده هم بيورمشلر دعا

كيم بيورنجه حبيب ذو الجلال++

چون حيات معنوى يه انتقال

هر برى در خادم دين مبين++

معركه اراى صفّ جاهدين

هر بربدر حارس شرع رصين++

حافظ احكام قرآن متين

قيلديلر دين او غرينه باشلر فدا++

ايتديلر جان ايله خدمتلر ادا

جوشه گلدى منبع ارباب دين++

هب غزايه دوشدى فى اللَّه مسلمين

سيل كبى اقدى صنوف جاهدين++

قالدى بحر حيرت ايچره عاندين

رايت اسلام پر فيض و ظفر++

هيبت انداز عيون اهل شر

موج اوروب دهشت ايله مانند برق++

تيترر اولدى باغيان غرب و شرق

باقمديلر عزت نفسه همان++

چون غزا ايله كچردى هر زمان

چارسويه قيلديلر اعلان دين++

عدله تابع اولدى طوعاً منكرين

هم عدالتده او رتبه اعتنا++

هم جلادتله ايدرلردى غزا

هر امورى اهله توديع ايتديلر++

عالم اسلامى توسيع ايتديلر

اولديلر "نصر من اللهه" قرين++

چار اساس اوزره قورلدى قصر دين

اويله محكم هم رصين و استوار++

كيم خللدن عارى تا يوم القرار

چار اركاندر بو قصر منجلى++

يعنى بو بكر و عمر عثمان على

طاق لاهوت پايه سى اولدى همين++

سيد الكونين فخر المرسلين

هر برى صاحب لدن كرسى مقام++

هر برى محراب عشقه بر امام

روحلرى راضى اوله بزدن همين++

رضوان اللَّه عليهم اجمعين

در حق عالى حضرت امامين

روضه فيض حرمكاه محمّددن حصول++

يعنى ايكى غنچه جانپاره ذات بتول

برى نسرين صفا نور دو چشم عاشقان++

كيم حسن بن علي سر لوحه عالم شمول

برى صد برك و فا محض شفاى درد دل++

هم حسين بن علي ديباجه صحف فحول

نيرين بر شرف طاق جهان معرفت++

پرتو انداز عيون و مسلك اراى وصول

الامان سبطين احمد قرة العين علي++

فخر امت ذى كرم ارايش قلب ملول

دركه والا كزك قطميريدر كمتر جلال++

اولميه رأفت نكاه فيض واحساندن ذهول